Смее да се чепка во сè, само во патните трошоци на пратениците не: Уставен суд ја отфрли иницијативата на Левица

Уставниот суд денеска ја одржа 37. седница на којашто расправаше и одлучуваше по девет иницијативи за оценување на уставност и законитост.

На седницата, како што информираше прес-службата на Уставен суд, било одлучено да не се поведува постапка за оценување на уставноста и законитоста за точките 3 и 4 од Одлуката за висината на надоместокот на пратениците за користење на автомобил во лична сопственост за службени цели и надоместок на трошоци за патарина. Иницијативата беше поднесена од пратениците на Левица, Димитар Апасиев и Борислав Крмов.

Како што образложија судиите, таква одлука е донесена врз основа на тоа што  Комисијата за прашањата на изборите и именувањата како постојано работно тело на Собранието, надлежно за определувањето на висината на надоместокот на трошоците кои, во согласност со прописите им се признаваат на пратениците, е надлежен орган за донесување на оспорената одлука.

– Правото кое пратениците го имаат на надомест за користење на автомобили во лична сопственост за службени цели и висината на овој надомест, се утврдени со Законот за пратениците. Со оспорената одлука се разработуваат условите за остварување на ова право, односно се прецизираат случаите кога се смета дека возилото се користи за службени цели. Оспорените точки 3 и 4 од Одлуката се во согласност со Законот за јавните патишта и со нив изворно не се утврдува право на пратениците. Станува збор за правно прашање, по кое веќе Судот претходно расправал и зазел став во предметот У.бр.85/2006, при што предмет на оцена била иста одлука на Комисијата за прашања на изборите и именувањата на Собранието, при што истиот став беше прифатен и во овој предмет, додадоа од прес-службата.

Share on Facebook

Tweet

Follow us

Save