Социјални платформи да ги бришат видеата што поттикнуваат опасно возење, наложи британската влада

„Тик-ток“ и другите социјални платформи да ги отстрануваат видеата што поттикнуваат опасно возење, побарала и наложила британската влада, откако во тешка сообраќајка во североисточна Англија загинаа седум лица, објавија британските медиуми.

Министерот за одбрана, Лук Полард, порача дека платформите мора самите да реагираат, а Владата е подготвена да ги принуди да го отстранат ваквиот материјал преку Законот за безбедност на интернет, пренесе „Би-би-си радио 4“.

Во несреќата загинаа полицајците Метју Блејдс (37) и Том Клаф (38), откако „Фолксваген пасат“, којшто претходно бил следен од полицијата, се движел во спротивна насока по двонасочна сообраќајница и директно удрил во нивното полициско возило. На местото на несреќата починале и петмина млади луѓе – Кол Роберт Ворти (17), Тео Реј (17), Макај Садингтон (18), како и Мајкл Роберт Кејхил (23) и Џејкоб Матусијак (23). Особено внимание предизвикаат информациите дека Садингтон претходно бил поврзуван со снимање опасно возење за „Тик-ток“. Тој во јули на Суд бил обвинет за напад на полицаец и предизвикување расно-мотивирана вознемиреност и страв.

– Сакам социјалните мрежи да преземат одговорност… Платформите не треба преку своите алгоритми да шират и финансиски да наградуваат содржини што го вeличаат опасното однесување на патиштата – порача Полард.

Тој предупреди дека, доколку компаниите не реагираат самостојно, Владата ќе ги искористи своите законски овластувања за да ги принуди да го отстранат таквиот материјал.

Полицискиот и криминален комесар за областа Кливленд, Мет Стори, за „Би-би-си радио 4“ ги потврди извештаите за видеата на „Тик-ток“, но ги повика луѓето да избегнуваат шпекулации.

Share on Facebook

Tweet

Follow us

Save