Со „пежо“ удрил во мотоциклист, го влечел неколку метри и побегнал од местото

На улицата „Рилски Конгрес“ во Скопје вчера се случил сериозен инцидент по претходно недоразбирање во сообраќајот, при што мотоциклист бил повреден, а возачот на автомобилот избегал од местото на настанот.

Како што информираат од Министерството за внатрешни работи, случајот бил пријавен во СВР Скопје на 23 јуни околу 18:20 часот.

Според пријавеното, по претходна расправија во сообраќајот, лице кое управувало патничко возило „пежо“ со скопски регистарски ознаки удрило во мотоцикл управуван од Г.Н.(29) од скопско. Од ударот, мотоциклистот паднал на коловозот.

Откако се подигнал, возачот на „пежото“, според пријавата, повторно го придвижил возилото и неколкупати удрил во мотоциклот, како и во патничко возило „цитроен“ со скопски регистарски ознаки, сопственост на В.О.(44).

Според информациите од МВР, Г.Н. во еден момент се фатил за предната врата од возилото „пежо“, но автомобилот продолжил да се движи и го влечел неколку метри, по што тој паднал на коловозот. Возачот потоа го напуштил местото на настанот.

Повредениот мотоциклист бил пренесен во Комплексот клиники „Мајка Тереза“ каде му била укажана лекарска помош.

Од МВР информираат дека се преземаат мерки за целосно расчистување на случајот и пронаоѓање на возачот.

Share on Facebook

Tweet

Follow us

Save