Студентка во еден месец положила 17 испити, тврди министерката Јаневска

Министерката за образование Весна Јаневска во гостување на „Сител“ изјави дека за една приватна високообразовна установа МОН поднело кривична пријава за фалсификување диплома зашто имале запишано студентка која во еден месец положила 14 до 17 испити.

-На пример, студентка во еден месец положила 14 до 17 испити, а во истовреме студирала и додипломски и постдипломски студии. Тоа реално не е можно. Не сум слушнала никаде во светот да се положат во еден месец 14 испити и да се биде и на додипломски и на постдипломски студии – рече министерката Јаневска.

Во рамките на контролата на универзитетите има пријави за фалсификување дипломи, назначување во несоодветно звање на професорскиот кадар, несоодветно трошење на буџетот од државата и за неправилен упис.

Министерката откри дека се затворени 18 институти меѓу кои Институт за бизнис економија во Скопје, Институт за геобиологија, археологија и подземни води во Скопје и Институт за мода и дизајн во Тетово.

Пропустите што ги констатира комисијата на Министерството за образование покажале дека не биле исполнети условите за научници кои треба да работат во институтот, некаде немало програма за научно-истражувачка работа, а имало и случаи во кои институтите биле сместени во несоодветни простории.

Share on Facebook

Tweet

Follow us

Save