Таравари: Работиме на решение за проблемот со хируршките сали

До крајот на годинава здравствените власти очекуваат да се изгради и инсталира нова компресорска станица за проблемот со хируршките сали. Министерот Таравари денеска соопшти дека започната е процедурата и веќе е објавен тендер од страна на службата за општи и заеднички работи.

Дотогаш операционите салите ќе продолжат да работат со помош на надворешните компресори, но и со помал интензитет.

„Јас мислам дека повеќе од половина од капацитетите веќе функционираат ќе видиме дали ќе можеме да организираме нешто и со ГОБ „Осми септември“ и со старата градска болница операциите да бидат кооридинирани оттука и евентуално колегите и оттука дали може таму да ги работат одредени случаи кои што навистина се итни и не може да се чека подолг период“, вели Арбен Таравари – Министер за здравство.

Таравари најави решенија за вработување на приватните специјализанти, а во иднина можно е и целосно да бидат укинати приватните специјализации.

Истовремено најави дека одредени специјализации ќе бидат ставени во мирување, а младите доктори ќе се насочуваат кон специјализации за кои има дефицит во болниците.

„Да направиме стратегија со која одредени специјализации ќе бидат во мораториум, а одредени ќе бидат фаворизирани, можеби ќе размислиме и начин за мотивација за младите лекари да одат на анестезиологија, радиологија, педијатрија и други специјализации кои ни недостасуваат во државата“, вели Арбен Таравари – Министер за здравство.

За две недели се очекува и новата позитивна листа на лекови за која министерот вели дека во иднина нема да се чека толку долго време за да се обновува, а Владата на седница утре на дневен ред ќе го има законот за укинување на економските директори во здравствените установи.

Како новина Таравари најави дека ќе се отворат и телефонски броеви на кои пациентите ќе може да пријавуваат директно кај тимот на министерот неправилности и проблеми во здравствениот систем.

Share on Facebook

Tweet

Follow us

Save