Телефонски разговор Османи-Шмит: Македонија работи за деескалација на Руско-Украинската криза

Во светло на најновиот развој на настаните во и околу Украина, министерот за надворешни работи на Република Македонија, Бујар Османи, оствари телефонски разговор со генералната секретарка на ОБСЕ, Хелга Шмит.

Во таа прилика, министерот Османи изрази сериозна загриженост за влошената безбедносна состојба во источниот дел на Украина, која уследи по признавањето на независноста на регионите Луганск и Доњецк од страна на Русија. Воедно, ја реафирмираше нашата поддршка за територијалниот интегритет и суверенитет на Украина и повика на доследно почитување на меѓународното право и неповредливоста на границите.

Дополнително, министерот Османи како член на триото претседавачи, потенцираше дека Македонија активно ќе учествува во процесите за деескалација и изнаоѓање на дипломатско решение преку суштествен дијалог меѓу инволвираните страни.

Воедно, Министерот изрази поддршка на Специјалната Мониторинг Мисија на ОБСЕ во Украина, и ја истакна подготвеноста од наша страна за дополнителен ангажман во функција на намалување на тензиите.

На крајот од разговорот, соговорниците се согласија дека дијалогот и дипломатските напори немаат алтернатива во смирување и деескалација на ситуацијата.

Share on Facebook

Tweet

Follow us

Save