Температурни рекорди во Хрватска: Сплит 39,7, Дубровник 39,1, Сенј 39,8 степени

Екстремната жештина во Хрватска собори температурни рекорди на три мерни станици. Нови рекордни вредности се измерени во Сплит, Дубровник и Сенј, а на јадранскиот брег температурите денеска се искачија до речиси 40 Целзиусови степени.

На метеоролошката станица Сплит-Марјан во 14 часот биле измерени 39,7 степени. Со тоа е надминат досегашниот рекорд на оваа станица од 39,5 степени, поставен на 30 јуни годинава, покажуваат официјалните податоци на хрватската Државна хидрометеоролошка служба – ДХМЗ.

Сепак, тоа не е апсолутниот температурен рекорд за поширокото подрачје на Сплит. На станицата Сплит-Каштела во 2017 година биле измерени 42,2 степени, па денешниот рекорд се однесува конкретно на мерната станица Сплит-Марјан.

Нов рекорд е регистриран и во Дубровник. Таму во 12 часот температурата достигнала 39,1 степен, со што е надмината максималната вредност од 38,6 степени измерена во 2025 година.

Рекорд паднал и во Сенј, каде вчера биле измерени 39,8 степени. Претходниот максимум изнесувал 39,7 степени и бил регистриран во 2015 година, објави метеорологот на ХРТ Зоран Вакула.

ДХМЗ за денеска прогнозираше највисоки дневни температури од 30 до 33 степени во копнениот дел на Хрватска, а на Јадранот меѓу 35 и 39 степени. Покрај жештината, долж брегот дува умерена и силна бура, под Велебит со удари кои локално достигнуваат и олјујна јачина.

Според прогнозата, утре се очекува мало намалување на температурите. На копното максималните вредности би требало да бидат меѓу 26 и 31 степен, додека на морето повторно се очекуваат високи 33 до 37 степени.

Трите нови рекорди во два дена уште еднаш го покажуваат интензитетот на актуелниот топлотен бран долж хрватскиот Јадран, каде температурите во средината на август се приближија до границата од 40 степени.

Share on Facebook

Tweet

Follow us

Save