Тетовската полиција со кампања за безбедност во сообраќајот – да не се вози кога се пие алкохол

Тетовските полицајци од утре започнуваат кампања со која целта е да се предупредат возачите да не управуваат возила под дејство на алкохол и во празнични денови. Полицијата со летоци ќе ги советува граѓаните да не возат под дејство на алкохол за да не ја доведуваат во ризик сопствената и безбедноста на другите учесници во сообраќајот.

-Заедничка цел на оваа активност на СВР Тетово-Отсек за превенција е подигнување на сообраќајната свест и култура на возачите, дури и во највеселите-празнични и други мигови да се воздржат од управување на нивните возила под дејство на алкохол и да ја доведуваат во ризик сопствената и безбедноста на другите учесници, возачи и пешаци, информира Марјан Јосифоски, портпарол на СВР Тетово.

Полициски службеници на Отсекот за превенција ќе делат наменски изработени летоци на македонски и на албански јазик и освежувачи за возила.

Како што рече Јосифоски, станува збор за летоци со пораки:„Ако пиеш не вози, ако возиш немој да пиеш!“, „За весели моменти, насмевки и доживувања вози одговорно!“, „За тие што те сакаат и за тие што ги сакаш, почитувај ги сообраќајните правила и прописи“, „Љубовта оправдува многу нешта, но не и загрозување на безбедноста во сообраќајот“.

Кампањата е насловена „Честит празник на љубовта и виното“, а ја реализираат заеднички Републичкиот совет за безбедност на сообраќајот на патиштата, Министерството за внатрешни работи и Факултетот за безбедност-Скопје.

Share on Facebook

Tweet

Follow us

Save