Ти-Џеј Шортс: Одиме да ги победиме сите во Талин!

Македонската кошаркарска репрезентација конечно е речиси комплетна, откако по приклучувањето на Ненад Димитријевиќ и Војдан Стојановски, вчера на тренинзите се појави и натурализираниот Американец, Ти-Џеј Шортс, кој беше најдобар во жолто-црвениот табор на последните четири средби од претквалификациите за ЕП 2025.

Искусниот плејмејкер е оптимистички расположен во пресрет на претквалификациската фаза за пласман на ЛОИ 2024 во Париз, во која нашата селекција прво ќе настапи во група во Талин против Естонија, Израел и Чешка. Најдобрите две репрезентации ќе продолжат во полскиот град Гљивице, каде би ја играле завршницата заедно со двата најдобри тима во групата со Полска, БиХ, Унгарија и Португалија.

„Среќен сум што се вратив во репрезентацијата, екипата и со нетрпение очекувам повторно да го облечам дресот на националниот тим. На секој натпревар во Талин ќе одиме на победа. Добро е што во тимот имаме искусни кошаркари, но и млади и талентирани играчи кои носат енергија. Кога ќе се спојат тие две работи, секогаш придонесуваат за добра атмосфера. Треба само да продолжиме да тренираме заедно, да дадеме се од себе и успехот ќе дојде“, изјави Шортс.

Македонија првиот меч во Талин ќе го одигра на 12 август против Израел, ден потоа е дуелот со Естонија, а на 15 август ќе ги одмери силите со репрезентацијата на Чешка.

Share on Facebook

Tweet

Follow us

Save