Тошковски: Трговијата со луѓе е глобален проблем, неопходна е меѓународна соработка

Министерот за внатрешни работи Панче Тошковски учествуваше на Регионалниот експертски состанок посветен на зајакнување на прекуграничната кривично-правна соработка и заштитата на странските жртви на трговија со луѓе, организиран од Канцеларијата на Обединетите нации за дрога и криминал – УНОДЦ.

Во обраќањето, Тошковски нагласи дека трговијата со луѓе претставува еден од најсериозните облици на организиран криминал и дека за нејзино сузбивање е неопходна координација меѓу државите и институциите.

„Трговијата со луѓе, како глобално и општествено неприфатлив чин, не познава граници, ниту пак прави разлика меѓу луѓето врз основа на нивното потекло, припадност или убедувања. Оттаму, нашиот одговор мора да биде исто толку одлучен: организиран, сеопфатен и мултидисциплинарен“, истакна Тошковски.

Тој предупреди дека криминалните мрежи, покрај традиционалните форми на експлоатација, развиваат и нови и посложени начини на злоупотреба. Како посебни ризици ги издвои трудовата и сексуалната експлоатација, како и ранливоста на странските државјани кои бараат подобри економски услови.

Според министерот, Западен Балкан истовремено претставува регион на потекло, транзит и крајна дестинација за жртвите на трговија со луѓе. Во Македонија во последните години доминира внатрешната трговија со луѓе, но се идентификуваат и странски жртви.

Како најранливи категории тој ги посочи децата и лицата погодени од сиромаштија, дискриминација и семејно насилство.

Тошковски потсети дека Македонија од 2001 година ги развива механизмите за борба против трговијата со луѓе, а системот се темели на пет столба – превенција, кривичен прогон, заштита, реинтеграција и обесштетување на жртвите.

„Во фокусот на секоја наша мерка секогаш стои Човекот — жртвата чие достоинство мора да го вратиме“, порача Тошковски.

Тој додаде дека подигнувањето на јавната свест, навременото препознавање и пријавувањето на случаите се клучни, бидејќи трговијата со луѓе често останува скриена, а жртвите невидливи за општеството.

Share on Facebook

Tweet

Follow us

Save