ТРАМП ГИ ОЛАБАВУВА САНКЦИИТЕ КОН РУСИЈА: Индија добива енергетско олеснување, а Украина стравува од нова предност за Москва

Одлуката на американскиот претседател Доналд Трамп привремено да ги суспендира клучните санкции и царински мерки поврзани со Русија предизвикува нови економски и геополитички последици.

Според Reuters, потегот особено ѝ одговара на Индија, која е меѓу најголемите светски купувачи на руска нафта и се соочуваше со можност за високи американски царини.

Санкциите предвидени со таканаречениот закон „Греам“ требаше да стапат во сила оваа недела, но Трамп потпиша извршна наредба со која привремено се откажува од нивната примена.

Според американскиот државен секретар Марко Рубио, администрацијата ќе искористи период до 60 дена за да ги процени економските последици од санкциите.

Парадоксот е што Вашингтон истовремено се обидува да изврши притисок врз Русија за завршување на војната во Украина и да обезбеди дополнителни количества руски енергенси за стабилизирање на цените.

Американската администрација веќе постигна договор со Москва за зголемени испораки на дизел на меѓународните пазари.

Според најавите, првичните количества за американскиот пазар треба да надминат 300.000 метрички тони.

Вашингтон го претставува договорот како економски потег што треба да ја намали цената на горивата, додека дел од американските функционери сметаат дека енергетската соработка може да биде дополнителен поттик за мировни преговори.

Но во Киев ваквиот развој предизвика сериозна загриженост.

Зеленски предупреди дека намалувањето на економскиот притисок врз Москва би можело да ѝ овозможи на Русија полесно да ја финансира војната.

За Индија, пак, американската одлука отвора простор за продолжување на набавките на руска нафта без непосреден ризик од дополнителни казнени царини.

Тоа би можело да ги подобри и изгледите за трговски договор меѓу Вашингтон и Њу Делхи.

Во основата на целата ситуација стои енергетската криза предизвикана од војната со Иран, која ја принудува американската администрација да бара дополнителни извори на гориво.

Развојот покажува колку тесно се поврзани војните во Украина и на Блискиот Исток со глобалните енергетски пазари.

Share on Facebook

Tweet

Follow us

Save