Трамп открива: „Се договорија, ќе ги прекинат нападите“

Американскиот претседател Доналд Трамп изјави дека Русија и Украина се договориле да ги прекинат нападите врз енергетските цели на другата страна.

„Украина се согласи да не ги напаѓа руските енергетски цели. Русија се согласи да го стори истото“, напиша Трамп на својата платформа за социјални медиуми, „Трут соушал“.

Истовремено, Трамп оцени дека порастот на глобалните цени на дизелот првенствено се должи на војната меѓу Русија и Украина, а не на конфликтот на Блискиот Исток.

„Зеленски мора да направи една работа. Мора да престане да го уништува дизел-горивото во Русија“, рече Трамп за време на посетата на Ирска.

Американскиот претседател оцени дека Украина може да напаѓа други цели, но треба да ги избегнува руските капацитети за производство на дизел, бидејќи таквите напади – според него – придонесуваат за недостиг на гориво и раст на цените.

Кремљ подоцна го поздрави повикот на Трамп до Киев да ги прекине нападите врз енергетската инфраструктура и капацитетите поврзани со производството на дизел.

Портпаролот на рускиот претседател, Дмитриј Песков, изјави дека треба да се поздрави „секој повик упатен до режимот во Киев да престане со нападите врз цивилната економска инфраструктура“.

Сепак, Песков одби да одговори дали Русија е подготвена да се воздржи од напади врз економската инфраструктура на Украина, пренесува „Танјуг“.

Share on Facebook

Tweet

Follow us

Save