Трговците ја скроија листата на производи кои би ги поевтиниле, предлагаат маржи од 3 до 15 отсто

Шеќерот, маслото, брашното, млекото, пилешкото месо, да бидат со маржа од 3 проценти. За лебот, тестенините, оризот, за солта, за кафето, оцетот, за квасецот, рускиот чај, урдата, видови сирење, кашкавал, јајца, ајвар, зеленчук, овошје, пиво, бело и црвено вино, како и за дел од средствата за хигиена – прашок, паста за заби, тоалетна хартија, и друго, трговците предлагаат маржа од 10 до 15 проценти.

Од Стопанска комора за трговија на мало и големо, каде ја подготвија листата, сметаат дека цените можат да ги намалат и предлагаат да има поевтинување на околу 150 продукти, а мерката да важи од 22 март до 22 април, со што би биле опфатени и претстојните празници Рамазан и Велигден.

Трговците и дистрибутерите очекуваат од утре да добијат одговор од Владата дали е прифатлив овој предлог или не. Не е познато што ќе се случи и дали Владата ќе го прифати овој предлог, затоа што не се во земјава ниту министерот за економија Бесар Дурмиши, ниту премиерот Мицкоски, со кои имаа состанок минатата недела.

Предлогот од Комората е подготвен откако Владата претходно одлучи да ги замрзне маржите на дел од производите на 10 отсто до крајот на април. Но, тоа се уште не се реализира затоа што најголемите трговци и дистрибутери во земјава побараа итен состанок со Владата за да ги кажат своите аргументи.

Share on Facebook

Tweet

Follow us

Save