Тропски бури предизвикаа хаос на Филипините, најмалку 23 загинаа

Најмалку 23 луѓе загинаа, а илјадници беа принудени да ги напуштат домовите низ Филипините, откако обилните врнежи предизвикани од засилениот југозападен монсун и тропските циклони „Луис“ и „Мајмај“ предизвикаа поплави и свлечишта, пренесува „Анадолија“.Националниот совет за намалување и управување со ризици од катастрофи (НДРРМЦ) утрово соопшти дека големи поплави и свлечишта погодиле повеќе региони, особено Лузон и делови од Висајас.

Поради излевањето на реките и непроодните патишта, голем број семејства биле евакуирани во привремени засолништа.

Според НДРРМЦ, локалните власти во координација со државните институции и единиците на локалната самоуправа спроведуваат спасувачки, хуманитарни и евакуациски операции.

Во повеќе провинции се оштетени патишта, мостови и земјоделски површини, што го отежнало транспортот и го нарушило животот на локалното население.

Во поплавените подрачја се пријавени и прекини на електричната енергија и проблеми со водоснабдувањето.

Советот предупреди дека во наредните денови се можни нови повремени врнежи и ги повика жителите на ниските и на подрачјата подложни на свлечишта да бидат внимателни и да ги следат препораките за евакуација.

Владините хуманитарни операции продолжуваат, додека властите работат на повторно воспоставување пристап до погодените населени места и обезбедување помош за евакуираните семејства.

Share on Facebook

Tweet

Follow us

Save