Украинските опозициски лидери со жесток одговор до Трамп: Нема избори за време на војна!

Двајца лидери на украинската опозиција ја отфрлија идејата за одржување избори додека земјата е во војна. Поранешниот претседател Петро Порошенко и поранешната премиерка Јулија Тимошенко изјавиле дека изборите треба да се одржат само откако ќе се воспостави мир.

Нивните изјави доаѓаат откако Доналд Трамп го нарече Володимир Зеленски „диктатор без избори“ поради неодржувањето избори по инвазијата на Русија – наратив често користен од Кремљ за делегитимирање на украинскиот лидер.

Да потсетиме, Зеленски освои речиси 75 отсто од гласовите на изборите во 2019 година, победувајќи го Порошенко.

Наводно, членовите на придружбата на Трамп разговарале со Порошенко и Тимошенко. Разговорите се фокусираа на тоа дали Украина би можела брзо да одржи претседателски избори, објави „Политико“.

Украинскиот устав не дозволува избори додека земјата е во воена состојба, а во секој случај би имало сериозни предизвици во организирањето на гласањето за луѓето на окупираните територии и војниците на фронтот.

Порошенко на „Телеграм“ информира дека изборите треба да се одржат само откако ќе се воспостави мир – најдоцна 180 дена по завршувањето на војната.

Тимошенко навела дека нејзиниот тим „разговара со сите наши сојузници кои можат да помогнат да се обезбеди праведен мир што е можно поскоро“, додавајќи дека изборите не треба да се одржуваат пред тоа да се постигне.

Share on Facebook

Tweet

Follow us

Save