Украински командант тврди: Заробивме руски војници во Бахмут!

Командантот на украинската армија Александар Сирски тврди дека неговите сили заробиле припадници на руските единици во Бахмут и постојано ги гранатираат непријателските позиции.

-Непријателот е заробен во Бахмут. Градот е под огнена контрола на одбранбените сили – објави денеска командантот на копнените сили на вооружените сили на Украина на својот канал Телеграм.

Сирски објави видео на кое наводно се гледа како украинските сили ги уништуваат руските позиции на покривите на зградите во разурнатиот град.

Заменик-министерката за одбрана Хана Малијар наведува дека вооружените сили на Украина веќе неколку дена се под оган при влегување и излегување од Бахмут, како и движењето на припадниците на руските единици низ градот.

-Ова стана возможно благодарение на тоа што нашите трупи ја презедоа контролата врз главните доминантни височини околу Бахмут – забележува Малијар.
Рамзан Кадиров објави дека специјалната бригада „Ахмат“ е итно преместена на фронтот кај Бахмут.

Некои руски воени блогери, исто така, со денови предупредуваат дека ситуацијата кај Бахмут е критична и дека Русија итно испратила резервни сили во областа северно од градот.

– Алармантни информации доаѓаат од областа северно од Бахмут, каде што е распоредена единица на 3-от армиски корпус, која нема доволно војници. Непријателот во таа област напредува, но колку длабоко не можам да кажам. Има малку информации, но резервите отидоа таму итно – напиша воениот блогер и поранешен член на ФСБ Игор Стрелков на Телеграм.

Инаку, по повлекувањето на Вагнер таму се сместени силите на редовната руска армија и паравоената единица позната како Бура З која е под контрола на руското Министерство за одбрана.

Украинската армија секојдневно тврди дека напредува на фронтот Бахмут и наведува дека го напаѓа градот од север и југ за да ја разбие руската одбрана. Микола Билиесков, експерт во Украинскиот национален институт за стратешки студии, наведува дека планот на Киев е да врзе што е можно повеќе руски сили за Бахмут.
Евгениј Пригожин, лидерот на Вагнер, на 20 мај го развиори руското знаме во Бахмут и прогласи победа над украинските сили. По освојувањето на градот, единиците на Вагнер се повлекле и ги предале своите позиции на редовните сили.

Битката кај Бахмут, можеби најкрвавата од почетокот на војната, официјално започна на 8 октомври 2022 година. Според руските медиуми, крвавата борба траела дури 224 дена.