ФБИ и МВР разбиле сајбер-шема: 20-годишник од Голема Речица водел нелегален онлајн пазар

Министерството за внатрешни работи поднесе кривична пријава против 20-годишниот Е.А. од тетовска Голема Речица, осомничен дека администрирал нелегална онлајн платформа преку која се продавале украдени лични и дигитални податоци.

Случајот бил откриен во координирана акција на Секторот за компјутерски криминал и дигитална форензика при МВР и американското Федерално истражно биро – ФБИ.

Според МВР, истрагата започнала по информации добиени од ФБИ за криминални активности поврзани со платформата OLVX. Осомничениот, во периодот од 2023 до 2025 година, наводно ги администрирал нејзините домени и веб-страници.

Преку платформата се нуделе украдени дигитални податоци, софтверски алатки и услуги за извршување компјутерски криминал. Меѓу понудените податоци биле и повеќе од 1.500 украдени пристапни акредитиви за кориснички сметки и компјутерски мрежи.

Истрагата покажала и дека од 2025 до 2026 година осомничениот ја водел групата ONEMILI на „Телеграм“, преку која се нуделе алатки и услуги за компјутерски измами, вклучително и незаконско враќање пари.

Од МВР соопштија дека биле обезбедени и докази според кои осомничениот преку „Телеграм“ набавувал и поседувал материјали со сексуална злоупотреба на деца.

Против него е поднесена кривична пријава за компјутерска измама, злоупотреба на лични податоци и производство и дистрибуција на детска порнографија.

Од МВР посочуваат дека станува збор за првата заедничка координирана сајбер-операција на македонската полиција и ФБИ насочена кон откривање и сузбивање организиран компјутерски криминал.

Share on Facebook

Tweet

Follow us

Save