Филипче ја обвини Владата за попречување на сексуалното образование

Младите имаат право на научно засновани информации и здравствена заштита, а образовниот систем мора да им помогне да носат одговорни одлуки, беше порачано на младинската трибина на СДММ на тема „Без табуа, со знаење – младите и сексуалното образование“. Лидерот на СДСМ, Венко Филипче, директно ја обвини актуелната Влада дека наметнува политики спротивни на потребите на младите и го ограничува нивниот пристап до едукација за репродуктивното здравје.

„За жал, денес имаме Влада која, како и сè друго во државата, го узурпираше и образовниот систем, креирајќи политики спротивни на потребите на младите. Образованието е важен дел од здравствената превенција и им помага на младите да го разбираат сопственото здравје, да препознаваат ризици и да носат одговорни одлуки“, рече Филипче, нагласувајќи дека образованието мора да се темели на наука и факти.

Најзагрижувачките податоци на трибината ги презентираше доц. д-р Стефан Васев, член на Комисијата за труд и социјална политика и на Европската асоцијација на сексолози. Тој предупреди дека стапката на малолетнички бремености во Македонија за 2024 година изнесува 15,7 на 1.000, што е драстично повисоко од европскиот просек кој изнесува околу 6 на 1.000. Васев како особено алармантен го посочи податокот за евидентиран абортус кај девојче на само 13-годишна возраст, повикувајќи државата да ги следи европските позитивни практики каде ова образование е интегрирано во програмите.

Претседателката на Комисијата за здравство на СДСМ, проф. д-р Ана Данева, се осврна на медицинските придобивки, потенцирајќи дека навремените информации се клучни за превенција на несакани бремености и сексуално преносливи инфекции. Пратеничката Даниела Николова додаде дека целта на сексуалното образование не е да им диктира на младите како да живеат, туку да им помогне да се спознаат себеси, да развијат самосвест и да ги почитуваат сопствените и туѓите граници.

Претседателката на СДММ, Стефанија Кузмановска, порача дека младите не смеат да бидат оставени без одговори на прашања кои директно влијаат врз нивната иднина и безбедност, барајќи знаење наместо табуа. Од трибината беше упатен директен повик до Министерството за образование и наука (МОН) да продолжи со концептот за воведување сексуално образование.

Share on Facebook

Tweet

Follow us

Save