Филмски грабеж во Скопје: Украле сеф, па бегајќи со мотоцикл го фрлиле кон полициско возило

Полицијата приведе осумнаесетгодишник кој со уште едно лице украле сеф од експозитура. Настанот се случил утрово во 3 часот на подрачјето на Бутел во Скопје.

-Полициски службеници од Единицата за интервентна полиција при СВР Скопје го лишиле од слобода Е.А.(18) од Скопје, поради тоа што претходно со уште едно лице со тврд предмет искршиле излог од објект- експозитура на правно лице, по што влегле и одзеле сеф, по што со мотоцикл го напуштиле местото на настанот, велат од МВР.

Веднаш по добиената пријава, полициски службеници од СВР Скопје презеле соодветни мерки и активности и ги лоцирале двете лица додека се движеле со мотоциклот, а кога им се приближиле, едно од лицата го фрлило сефот кон полициското возило.

Полицијата презема мерки за пронаоѓање на другото лице и по целосно документирање на случајот ќе следува соодветен поднесок.

Share on Facebook

Tweet

Follow us

Save