ФИНАНСИСКИ ПОТРЕС НА ВОЛСТРИТ: За еден ден избришани 2.500 милијарди долари од технолошкиот пазар!

Американските финансиски пазари се соочуваат со нов бран нестабилност, откако силниот пад на акциите на технолошките компании избриша приближно 2.500 милијарди долари од пазарната вредност на компаниите во индексот Nasdaq за само еден ден.

Според анализата на „Ројтерс“, Nasdaq во четвртокот забележал пад од 5,5 проценти, што претставува еден од најголемите еднодневни падови во последниот период.

Негативните движења доаѓаат по изборниот пораз на Републиканската партија на американските конгресни избори, но и по зголемените сомнежи на инвеститорите за исплатливоста на огромните вложувања во вештачката интелигенција.

Во изминатите години технолошките компании вложија стотици милијарди долари во изградба на центри за податоци, развој на вештачка интелигенција и набавка на напредни компјутерски чипови.

Сепак, сè повеќе инвеститори го поставуваат прашањето дали очекуваните приходи ќе бидат доволни за да ги оправдаат овие трошоци.

Дополнителен притисок создаваат високите цени на енергијата и храната, кои ги одржуваат инфлациските ризици на високо ниво.

Во вакви услови, Федералните резерви би можеле повторно да ги зголемат каматните стапки, што би го поскапело задолжувањето на компаниите и домаќинствата.

Пазарните очекувања за зголемување на каматите во декември дополнително се засилија по новите податоци за американскиот пазар на труд.

Иако економијата на САД во октомври отворила 165.000 нови работни места, а невработеноста се намалила на 4,1 процент, силниот пазар на труд би можел да ѝ даде дополнителен простор на централната банка за рестриктивна монетарна политика.

Аналитичарите предупредуваат дека комбинацијата од геополитички ризици, висока инфлација и пад на технолошките акции може да ја зголеми нестабилноста на глобалните финансиски пазари.

Share on Facebook

Tweet

Follow us

Save