INFOMAX.MK

Скопската градоначалничка Данела Арсовска денеска изврши увид на отпочнувањето на третата фаза на изведба на новата Ботаничка градина во Скопје во рамки на Зоолошката градина, која се простира на 12.600 квадратни метри.

Просторот на Ботаничката градина беше претходно празен и неуреден простор кој сега е природен спој меѓу Зоолошката градина и Градскиот парк и претставува ново зелено катче за одмор и рекреација на посетителите. Како што најавивме по завршувањето на изведба на проектот, во градината предвидени се прикази на ретки или необични растенија, едукативни часови од ботаничари, хортикултуристи и градинари, како и настани за најмладите генерации.

Уредувањето на градината е во својата трета фаза, а проектот го изведуваат екипите на јавните претпријатија „Улици и патишта“ и „Паркови и зеленило“. Во градината се засадуваат автохтони видови растенија кои се природно распространети во Македонија, но ќе има и алохтони видови – растенија донесени однадвор. Се садат воедно и ендемични растенија кои се специфични само за Македонија.