(Фото) Катастрофални услови во тетовската касарна: Мувла, распаднати ѕидови и фасада – Од Одбрана велат дека е предвидена реконструкција

До редакцијата на Инфомакс пристигнаа фотографии од касарната Кузман Јосифовски Питу во Тетово. Припадниците на АРМ се жалат на катастрофални услови, влага, мувла, распадната фасада и кровови кои протекуваат.

За информации за состојбата во касарната се обративме до Министерството за одбрана, од каде ни кажаа дека реконструкција на делови од касарната е веќе предвидена, а дел од работите би требало да завршат до крајот на годинава.

– Министерството за одбрана заедно со Генералштабот на Армијата во континуитет работи на подобрување и подигнување на условите за сместување и работа за припадниците на Армијата.
Согласно приоритетите на Армијата, до крајот на оваа година конкретно во Касарната ,,Кузман Јосифовски Питуʼʼ – Тетово, предвидено е да се изврши замена на кровната конструкција на Кантината, реконструкција на санитарни јазли и замена на прозори во стражара, целосна реконструкција на објект бр.35 и реконструкција на топловодната мрежа во должина од 200м.
Би сакале да напоменеме дека за реализација на овие, но и на други проекти кои опфаќаат реконструкција, адаптација, уредување, санација и тековно одржување во касарните во Велес, Кичево, Ќојлија, касарната Илинден, Воено медицинскиот центар е склучен Рамковна спогодба за одржување во висина од 41.300.000,00 денари со вклучен ддв.
Покрај ова, согласно Планот за работа за 2026 година, веќе е завршено со изведба на работите на кровни конструкции на објекти во касарните ,,Гоце Делчевʼʼ (2 објекти, ,,Ќојлијаʼʼ, ,,Јане Санданскиʼʼ, АП ,,Криволакʼʼ, завршено е со комплетно реновирање на објект во касарната ,,Јане Санданскиʼʼ во Штип, завршено е градежно уредување на повеќе објекти во Генералштабот, Воено медицинскиот центар,
а во процес се инфраструктурни активности во касарната ,,Мирче Ацевʼʼ во Прилеп, ,,Јане Санданскиʼʼ во Штип, ,,Гоце Делчевʼʼ и ,,Илинденʼʼ во Скопје, Дренов дол и АП ,,Криволакʼʼ.

Сето ова се прави со една единствена цел, припадниците на Армијата да имаат современи услови за работа и зголемена безбедност.
Министерството за одбрана во повеќе наврати информираше дека состојбата со многу објекти е сериозна, но дека активно се работи на подобрување на истата. – стои во одговорот од Министерството за одбрана.

Share on Facebook

Tweet

Follow us

Save