Франција блокираше две поглавја во преговорите на Црна Гора со ЕУ

Франција го блокираше затворањето на две поглавја во преговорите за пристапување на Црна Гора во Европската Унија, но се очекува Подгорица да затвори три поглавја следната недела.

Според извори на ТВЦГ, Црна Гора треба да ги затвори поглавјата за правото на основање компанија и слободата на обезбедување услуги (3), слободното движење на капиталот (4) и трговското право (6).

Меѓувладина конференција е планирана за 16 декември, пред почетокот на седницата на Советот на министри за општи работи на Европската Унија.

Франција се спротивстави на затворањето на поглавјата за земјоделство и рурален развој (11) и рибарство (13), поради што овие поглавја остануваат отворени по последната рунда консултации.

Постојаните претставници на земјите-членки повторно ќе се состанат во текот на викендот, што би можело да биде дополнителна можност да се разговара за потенцијалното затворање на уште некои поглавја пред меѓувладината конференција.

Црна Гора официјално ги почна преговорите за членство во Европската Унија на 29 јуни 2012 година, откако доби статус на кандидат во 2010 година.

Share on Facebook

Tweet

Follow us

Save