Франција: Две мали деца пронајдени мртви во автомобил за време на екстремен топлотен бран

Две момчиња, на возраст од две и четири години, денеска биле пронајдени мртви во автомобил во градот Карпентра во југоисточна Франција, додека земјата се соочува со еден од најсилните топлотни бранови во последните години.

Според информациите на француските медиуми, децата, кои биле браќа, биле пронајдени околу пладне во возило паркирано во близина на семејната куќа. Надлежното обвинителство соопшти дека точната причина за смртта сè уште не е официјално утврдена, но дека екстремно високите температури се една од главните насоки во истрагата. Полицијата отвори истрага за да ги утврди сите околности под кои се случила трагедијата.

Несреќата се случува во период кога Франција е погодена од интензивен топлотен бран. Во голем дел од земјата се активирани највисоки нивоа на предупредување поради екстремните горештини, а температурите во регионот Воклиз се приближуваат до 40 степени Целзиусови.

Француските власти веќе презедоа вонредни мерки, вклучително и затворање на повеќе од 1.300 училишта поради високите температури. Истовремено, граѓаните се повикани на зголемена внимателност, особено кога станува збор за деца, постари лица и други ранливи категории на население. Експертите постојано предупредуваат дека температурата во затворен автомобил може да достигне опасно високи вредности за само неколку минути, дури и кога надворешните услови не изгледаат екстремни, што го прави оставањето деца во возило исклучително ризично.

Share on Facebook

Tweet

Follow us

Save