Франција испрати нуклеарна порака, Москва одговори: „Ова е пат без излез“

Нуклеарното одвраќање повторно се враќа во центарот на европската безбедност.

Франција изврши тестирање на балистичка ракета способна да носи нуклеарна боева глава, лансирана од подморница во близина на брегот на Бретања.

Францускиот претседател Емануел Макрон го поздрави тестирањето и порача дека сигналот бил испратен „гласно и јасно таму каде што треба да биде примен“.

Макрон директно не ја именуваше Русија.

Но Москва очигледно ја прими пораката.

Портпаролот на Кремљ Дмитриј Песков денеска реагираше оценувајќи дека францускиот тест покажува дека Европа сè повеќе го гради својот безбедносен идентитет врз конфронтација со Русија.

Според него, тоа е „пат без излез“.

Кремљ порача дека Русија внимателно ги следи ваквите активности и останува во состојба на готовност, но истовремено тврди дека проблемите треба да се решаваат преку дијалог, а не преку демонстративни ракетни лансирања.

Тестот доаѓа во исклучително чувствителен момент.

Односите меѓу Русија и европските членки на НАТО нагло се влошуваат, додека Москва повторно предупредува дека би можела да го употреби својот нуклеарен арсенал доколку биде директно нападната руска територија.

Особено чувствителна точка е Калининград – руската енклава сместена меѓу Полска и Литванија.

Путин неодамна предупреди дека во случај на директен напад врз Калининград, употребата на „сите оружја“ со кои располага Русија би се нашла на дневен ред.

Во исто време, Франција е единствената нуклеарна сила во Европската Унија по излегувањето на Велика Британија од блокот.

Париз во последните години сè погласно разговара за улогата што француското нуклеарно одвраќање би можело да ја има во пошироката европска безбедност.

Затоа тестирањето има значење многу поголемо од обична техничка проверка на ракетниот систем.

Во Европа повторно се испраќаат пораки со оружје создадено токму за сценарио за кое сите страни велат дека никогаш не сакаат да се случи – директен конфликт меѓу нуклеарни сили.

Share on Facebook

Tweet

Follow us

Save