Франција негира дека побарала отварање на хуманитарни коридори во Украина

Францускиот претседател Емануел Макрон не побарал од рускиот лидер Владимир Путин да отвори хуманитарни коридори кон Русија и Белорусија за Украинците кои бегаат од бомбардирањата, соопшти Елисејската палата, негирајќи го тврдењето на руските официјални лица.

Москва ги објави предложените патишта за бегство од Харков, Киев, Мариупол и Суми, откако Путин и Макрон разговараа вчера по телефон, нагласувајќи дека потегот бил преземен по „лично барање“ на Макрон.

Но, Елисејската палата соопшти дека не било поднесено такво барање, при што Макрон инсистирал на „почитување на меѓународното хуманитарно право, заштита на цивилното население и доставување помош“.

– Тоа значи дека мора да се организира заштита на цивилите и да се дозволи хуманитарен пристап, изјави денеска претставник на француското претседателство, кој побара да остане анонимен.

Украинската Влада ги отфрли понудите за безбедно преминување кон Русија, која ја започна својата инвазија пред речиси две недели, или до Белорусија, која и нуди на Москва терени за напади.

Повеќе од 1,5 милиони луѓе побегнале преку границите на Украина од почетокот на рускиот напад, според ОН, создавајќи ја најбрзо растечката бегалска криза од Втората светска војна.

Share on Facebook

Tweet

Follow us

Save