Француската амбасада во Конго во центар на скандал: Едно видео предизвика лавина од реакции

Видео од француската амбасада во Конго, кое беше објавено и набрзо отстрането од социјалните мрежи, предизвика критики за расистички стереотипи и „колонијален“ пристап во прикажувањето на конгоанските кандидати за француски визи.

Видеото насловено како „Виза на вистината“ е објавено на 26 јуни по наредба на француската амбасада во Бразавил, а потоа е отстрането по барање на француското Министерство за надворешни работи, кое го оценило како „несоодветно“, јавува денес телевизијата BFM.

Во видеото, конгоанскиот комичар Џоџо Ла Леџенд игра човек во фудбалски дрес кој бара виза пред амбасадата и тврди дека Франција ги отфрла сите барања, вклучително и студентските, а потоа го прашува конзулот за барањата за виза.

Конзулот му објаснува дека се важни соодветниот профил и соодветната документација, наведувајќи како негативни примери ненадејното појавување на голема сума пари на банкарска сметка или фалсификување документи.

Во вториот дел од видеото се појавува конгоанската актерка Маман Насионал, која тврди дека студирала во Франција и не мамела во процесот на добивање виза.

Видеото завршува со наведување на барањата за апликантите, вклучувајќи автентичност, сериозност, јасен проект и напорна работа.

Претседателката на организацијата SOS Racisme, Доминик Сопо, го критикуваше видеото, оценувајќи дека претставува „нешто многу колонијално“ поради, како што изјави, прикажувањето што потсетува на стереотипи од колонијалниот период.

Дипломатски извор за гореспоменатиот портал изјавил дека видеото е направено од француската амбасада во соработка со конгоански инфлуенсери и е оценето како несоодветно, поради што е повлечено.

Share on Facebook

Tweet

Follow us

Save