Хакери нападнаа француски центри за крв: ја зголемиле температурата во ладилници со крвни продукти

Француските центри за крводарување и трансфузија биле цел на хакерски напад, во кој биле компромитирани системите за управување со три ладилни складишта во кои се чуваат витални крвни продукти. За нападот објави „Гардијан“, повикувајќи се на информациите од француската Национална служба за крвоснабдување.

Од Француската служба за крвоснабдување (ЕФС) соопштиле дека хакерите успеале да навлезат во системите и да ги зголемат температурните прагови и вредностите за одмрзнување на многу високо ниво.

Според службата, благодарение на алармните системи, техничките екипи навреме реагирале и интервенирале пред крвните продукти да бидат компромитирани.

Нападот се смета за дел од серијата кибернапади насочени кон системи за ладење низ Европа.

ЕФС е државна институција задолжена за собирање, тестирање, обработка и дистрибуција на крв, плазма и тромбоцити до повеќе од 1.900 болници низ Франција.

Службата обезбедува поддршка за повеќе од еден милион пациенти годишно.

Share on Facebook

Tweet

Follow us

Save