Ховениер: Одлуките на Владата на Косово имаат директно негативно влијание врз Србите

Владата на Соединетите Американски Држави е длабоко загрижена поради неодамнешните активности на Владата на Косово, кои имаат директен и негативен ефект врз припадниците на етничките Срби и другите малцински заедници во Косово, изјави амбасадорот на Соединетите Американски Држави во Косово, Џефри Ховениер.
Во соопштението објавено на социјалната мрежа „Х“, Ховениер наведува дека овие акции непотребно ги зголемуваат етничките тензии и како резултат на тоа ја ограничуваат способноста на САД да служат како ефикасен застапник за Косово на меѓународната сцена.

„Тие ги вклучуваат операциите што косовската полиција ги спроведе по налог на Министерството за внатрешни работи во текот на изминатата недела во канцелариите на институциите со кои раководи Србија во Драгаш, Пеќ, Исток и Клина, како и во невладината организација Центар за мир и Толеранција во Приштина. Загрижени сме и од денешните дејствија на косовската полиција за одземање динари и возилото со кое се превезувале заради делење социјални бенефиции од Србија“, напиша Ховениер.

Американскиот амбасадор, кој е првиот меѓународен функционер кој го спомна упадот во српските институции и ги наведе сите, изјави дека очекува косовските власти да се погрижат лицата на кои им биле наменети овие исплати на социјална помош, да ги добијат без одлагање.

„Одговорноста на Владата на Косово е да ја промовира визијата изнесена при нејзиното основање и содржана во нејзината Декларација за независност и Устав: визија за целосно мултиетничка демократија која одговара на грижите на сите нејзини граѓани. Прашањата поврзани со структурите поддржани од Србија во Косово треба да се решат преку Дијалогот предводен од ЕУ. Исто така, го повторуваме нашето барање Косово да ја одложи имплементацијата на изменетата Регулатива на Централната банка на Косово за готовинско работење додека не се воспостават задоволителни процедури во согласност со европските стандарди и додека населението не биде доволно информирано за тоа како ќе се одвива транзицијата на нивните придобивки“, се вели во соопштението.

Share on Facebook

Tweet

Follow us

Save