Хронична дијареја, намален имунитет, отпорност на антибиотици – Д-р Ристески со предупредување за здравјето на гостиварци

Не престанува загриженоста за здравјето на гостиварци по скандалот со загадената вода, или како што велат самите граѓани, „коктелот од фекалии и хлор“ кој течел од чешмите во домаќинствата.

Според доктор Милан Ристески, консумирањето вода загадена со фекални материи, покрај акутните симптоми, може да остави и долгорочни последици врз здравјето, особено врз цревниот микробиом.

Тој наведува дека патогени микроорганизми, како одредени видови E. coli, Salmonella и паразитот Giardia, можат да ја нарушат природната цревна микрофлора, што потенцијално може да доведе до: хронично воспаление и синдром на пропустливи црева; долготрајни дигестивни проблеми, вклучително и синдром на иритабилно дебело црево (IBS) и хронична дијареја; колонизација со бактерии отпорни на антибиотици; нарушување на имунолошкиот систем и зголемен ризик од одредени автоимуни и метаболички заболувања; можни последици врз менталното здравје преку нарушување на оската црева–мозок.

„Дали е некој свесен за овие потенцијални долгорочни здравствени проблеми на гостиварчани? Колкав ќе биде финансискиот импакт?“, прашува д-р Ристески.

Надлежните институции досега не објавиле проценка за евентуалните долгорочни здравствени последици, додека забраната за користење на водата од гостиварскиот водовод останува во сила сè додека лабораториските анализи не потврдат дека е безбедна.

Share on Facebook

Tweet

Follow us

Save