ЦУК побарал од Градот и од Општината да го проверат оштетениот пат во Усје

Иако поминаа само неколку денови од последната објава за оштетувањето на патот во населбата Усје и опасноста од негово свлекување, обемните дождови во изминатава недела уште повеќе ја оштетија улицата „4“, каде што веќе може да се види дека асфалтот на одредени места е целосно одвоен, а земјиштето полека се свлекува.

Влошувањето на состојбата и зголемувањето на опасноста од свлечиште уште повеќе го „запалија“ алармот кај усјанци, кои секојдневно бараат реакција од Општината и објавуваат слики од состојбата со коловозот.

Во разговор со еден од жителите, тој посочи дека врнежите го забрзуваат процесот на распукување на улицата и нејзино целосно свлекување. Според него, неодамна коловозот бил раскопан и од екипи на „Водовод и канализација“, кои по завршувањето на нивните задачи, дупката ја затрупале со земја и на местото уште нема нов асфалт.

– Патот односно улица „4“ веќе цела година е оштетена, но изминатиов месец поради зголемувањето на дождови, почна рапидно да се влошува и да се одвојува. На местото неодамна интервенираа и од „Водовод и канализација“, кои раскопаа еден дел од улицата, а откако завршија местото го затрупаа со земја, оттогаш ситуацијата повторно се влоши – вели тој.

ЦУК им дал задачи на Градот и на Општината
Жителите велат дека во повеќе наврати се обратиле до Општина Кисела Вода и побарале помош и реакција, но досега, како што тврдат, не добиле одговор на нивните барања, иако според нив Општината е добро запознаена со овој проблем.

Еден од нив случајот го пријавил и во Центарот за управување со кризи со надеж дека оттаму ќе се „размрдаат“ работите за некој од Општината да излезе и да го провери патот и опасноста од негово свлекување.

Од ЦУК велат дека се запознаени со состојбата на улица „4“ во Усје и информираат дека по пријавата за проблемот, Центарот ги известил сите надлежни институции, а од Град Скопје, Општината и „Водовод и канализација“ побарал нивните стручни и инспекциски служби да излезат на терен.

– Центарот за управување со кризи е запознаен со состојбата, односно информацијата за овој проблем е пристигната и е евидентирана во ЦУК. Центарот за управување со кризи ги извести надлежните институции и субјекти, меѓу кои Град Скопје, Општина Кисела Вода и ЈП „Водовод и канализација“, со барање нивни надлежни инспекциски служби и стручни екипи да излезат на терен, да извршат увид и да ја констатираат фактичката состојба – велат од ЦУК.

Од Центарот објаснуваат дека од гореспоменатите институции побарале да преземат соодветни мерки и да утврдат која е причината за оштетувањето и дали има опасност од евентуално влошување на состојбата.

– Воедно, од надлежните институции е побарано да преземат соодветни мерки и активности во рамките на своите надлежности, со цел утврдување на причините за оштетувањето и спречување на евентуално понатамошно влошување на состојбата. ЦУК ја следи состојбата и очекува повратни информации од надлежните институции за преземените активности – велат од Центарот.

Share on Facebook

Tweet

Follow us

Save