Шојгу: Украина изгуби повеќе од 215.000 војници минатата година

Рускиот министер за одбрана Сергеј Шојгу денеска изјави дека руските сили ќе продолжат доследно да ги постигнуваат целите на „специјалната воена операција“ во Украина. Шојгу, на состанокот на военото раководство, рече дека Украина минатата година изгубила повеќе од 215.000 војници и 28.000 парчиња опрема, пренесе Тас.

„Ние ја одржуваме стратешката иницијатива по целата линија на фронтот“, истакна Шојгу.

Тој додаде дека во исто време, украинските војници ги исцрпуваат своите ресурси, а на бојното поле нема резултати.

Шојгу нагласи дека опремувањето на руската армија и морнарица со најсовремени оружја, вклучително и оружје базирано на технологии за вештачка интелигенција, ќе продолжи.

„Одржувањето на руската нуклеарна тријада во висока борбена готовност е една од клучните задачи доделени на Министерството за одбрана од рускиот претседател Владимир Путин“, рече Шојгу.

Тој најави дека Министерството за одбрана на Русија ќе го зголеми снабдувањето на армијата со најпотребното оружје, а особено ќе започне масовно производство на широк спектар на беспилотни летала, пренесува Танјуг.

Share on Facebook

Tweet

Follow us

Save