Јас имам право на Република Македонија!

/За мојот македонски национализам/

Можат да ја убиат птицата, но не можат да го убијат нејзиниот лет

Јордан Плевнеш

Јас сум Македонец, со македонска свест и како таков си имам свое македонско гледиште за минатото, сегашноста и иднината на мојата Татковина Македонија.

Мојот основен став е –  Македонската нација е жива аксиома. Значи, не е хипотеза што треба да се докажува.

Македонец, пред се е етнографоним, име на народ, на етничка група.

Истовремено е и графоним, име добиено според името на географска област(Македонија). Секако, Македонец е и историски поим кој потекнува од античко време(од искон) и преку средновековието се протега, т.е. егзистира се до денес, а сигурно и до вечноста.

Доколку една заедница се стекнала со идентитет(македонски), таа го има правото да биде народ(македонски народ), а народот го има правото на суверенитет(внатрешен и надворешен/меѓународен) и на државност(Република Македонија).

Јазикот македонски е првиот елемент при националната идентификација.

До него се етногенезата, т.е. потеклото на македонскиот народ/нација.

И секако, личното чувство за припадност на секој Македонец посебно и на сите заедно.

Свеста и чувството дека сум Македонец за мене се светост. Мојата љубов кон Македонија е безусловна и безгранична. Македонските интереси, македонскиот национален дух, македонскиот јазик, народното творештво, обичаите и културната традиција се мојот македонски национализам. А тоа е македонското национално чувство во мене. Тоа е историскиот повик на Македонецот. Повик кој се исполнува само како слободен и рамноправен граѓанин на Македонија и Светот. Граѓанин на кого му е дозволено да мисли, да чувствува, да зборува и да дејствува како слободен Македонец.

Република Северна Македонија, на домашните анационални елементи и на иностраните злонамерници, не е моја.

Јас имам право на мојата Македонија – Република Македонија.

Колумната е посветена на двајца големи Македонци: На балканскиот лингвистички Моцарт – Крсте Петков Мисирков, човекот без кој Македонија ќе беше без дефиниција. Човекот кој изврши коперникански пресврт во македонцките работи; И на Јордан Плевнеш кој животот и делото ги посвети на македонската национална историја и на нашата национална трагедија. Човекот кој ни го разјасни поимот Мацедонише цуштенде/Македонски состојби и човек кој македонската култура и уметност ги прослави на пет континенти.

Сотир Костов

Share on Facebook

Tweet

Follow us

Save