Ја основаа пред три дена, одма се фатија за работа:Фондацијата „Заев-Едно општество за сите” испрати 20 тони производи хуманитарна помош во Украина

Фондацијата „Заев – Едно општество за сите” испрати 20 тони производи македонска хуманитарна помош за војската и за цивилното население во Украина.
Помошта е доставена во координација со Горениук Олександр, пратеник во Парламентот на Украина.
Како што е наведено, помошта пристигнала во Одеса.

„Денеска Одеса доби серија хуманитарна помош од нашите добри пријатели од Северна Македонија поточно од фондацијата на поранешниот премиер на земјата Зоран Заев – „Фондација Заев – Едно општество за сите“. Примени се 20 тони производи кои ќе одат за потребите на вооружените сили на Украина, бегалците и оние на кои навистина им се потребни. Ние сме многу благодарни на народот на оваа земја и лично на господин Зоран Заев и неговото семејство за поддршката на Украина во борбата против рускиот окупатор“, напиша Олександр.

Информацијата за помошта ја сподели и експремиерот Заев во објава на социјалните мрежи, коментирајќи дека Одеса е стратешка позиција на демократска Украина, но и град од каде нашиот Крсте Петков Мисирков дејствувал за македонските работи.

„Нека биде оваа помош придонес кон заштитата на украинското население кое е под воената агресија од страна на Русија. Поддршката на независноста и суверенитетот на Украина и осудата на руската воена инвазија е наша јасна позиција како припадници на западниот, демократски и мирољубив свет“, напиша експремиерот.

Share on Facebook

Tweet

Follow us

Save