Јемен повика на меѓународна помош во борбата против Хутите

Јемен повика на посилна поддршка од меѓународната заедница во борбата против побунетите припадници на проиранската милиција Хути.

Потпретседателот на Претседателскиот лидерски совет на Јемен, Абдула Абдулкадер Ал Алими-Бавзер, во обраќањето пред Генералното собрание на ОН во Њујорк рече дека поминале 12 години од, како што ја нарече, „пучот извршен од терористичката милиција Хути“.

Тој оцени дека Хутите ги ескалирале тензиите во регионот, претворајќи „еден од најважните поморски патишта во светот во средство за притисок и пазарење во конфронтацијата на Иран со светот“.

„Заштитата на тој стратешки поморски пат е заедничка регионална и меѓународна одговорност, што Јемен не може сам да ја преземе“, рече тој, додавајќи дека тоа е обврска на секоја економија што зависи од безбедноста на синџирите на снабдување, енергијата и слободата на пловидба.

„Она што денес го бараме од меѓународната заедница не е постојано управување со кризите, туку стратешко партнерство што ќе придонесе за безбедност, стабилност и развој во корист на Јемен, регионот и меѓународниот мир и безбедност“, рече Алими-Бавзер.

Претходно денеска во ОН 80 држави ја осудија одлуката на проиранската милиција на Хутите повторно да го започне конфликтот во Јемен, како и нејзините воени активности кон Саудиска Арабија и во Црвеното Море.

Хутите неодамна во брза офанзива ја зазедоа западната јеменска крајбрежна територија, со што добија пристап до стратешки важниот Баб ел Мандеб, на влезот во Црвеното Море.

Со ескалацијата на конфликтот, Саудиска Арабија повторно беше цел на напади од својот јужен сосед.

Важноста на Баб ел Мандеб дополнително се зголеми поради кризата во Ормуската Теснина.

Преминот низ Ормуска Теснина е значително ограничен од почетокот на војната што ја започнаа САД против Иран, додека Техеран настојува да го контролира сообраќајот низ Теснината.

Share on Facebook

Tweet

Follow us

Save