Џонсон призна: Војната во Украина може да трае до крајот на 2023 година и Русија има “реална можност” да победи

Британскиот премиер Борис Џонсон денеска изјави дека постои „реална можност“ Русија да победи во инвазијата на Украина.

-Путин има огромна војска, но, тој има многу тешка политичка позиција бидејќи направи катастрофална грешка. Единствената опција што сега ја има е да продолжи да се обидува да го користи својот ужасен пристап за „мелење“, предводен од артилерија, за да се обиде да ги сотре Украинците – рече Џонсон во Њу Делхи.

Тој уште истакна дека верува во проценките на британското разузнавање дека војната би можела да трае до крајот на 2023 година.

-Тој е многу блиску до обезбедување копнен мост во Мариупол сега. Се плашам дека ситуацијата е непредвидлива во оваа фаза. Мораме да бидеме реални за тоа – посочи Џонсон.

Џонсон, исто така, рече дека Велика Британија ќе испрати повеќе артилерија до украинските сили и потврди дека британската амбасада ќе биде повторно отворена во главниот град на Украина следниот месец.

Share on Facebook

Tweet

Follow us

Save