1.408 ПУШКИ ОД ВОЈНИТЕ ПРОНАЈДЕНИ ВО БИТОЛА: Граѓаните да пријават ако пронајдат гранати и оружје, вели ЦУК

Регионалниот ЦУК Битола, известува дека во близина на поранешниот гарнизон во Битола, при изведување на градежни земјени работи пронајдени се 1.408 пушки од минатите балкански војни и истите се подигнати и складирани на безбедно од страна на ДЗС Битола.

Се предупредуваат граѓаните ако случајно пронајдат оружје, бомби, гранати и слични неексплодирани бојни средства (НУС) од минатите војни да не ги фаќаат и да не ги поместуваат, туку едноставно да ја пријават локацијата и виденото на 112 во ЦУК, а потоа надлежните за НУС од Системот за управување со кризи безбедно ќе ги отстранат и неутрализираат, согласно стандардни оперативни процедури.

Центарот за управување со кризи (ЦУК) информира дека имало вкупно 1.714 повици на Единствениот повикувачки број за итни случаи 112 во ЦУК во последното деноноќие, од коишто „реални“ повици биле 61,84%, а 38,16% биле за други потреби на граѓаните што не биле итни.

Има еден пожар на отворено во последното деноноќие. Пожарникарите од ТППЕ Радовиш од 18:30 часот гаснеле до доцна во ноќта шумски пожар во с. Коџалија, над гробиштата. Била зафатена со пожарот дабова шума на непристапен терен.

Share on Facebook

Tweet

Follow us

Save