15-годишник загина во експлозија за време на училишна екскурзија во Израел

Петнаесетгодишно момче загина, а повеќе лица беа повредени во експлозија за време на училишна екскурзија во северен Израел, во близина на границата со Либан. Меѓу повредените има ученици и наставници кои пешачеле по Израелската национална патека.

Според првичната истрага, експлозијата најверојатно ја предизвикала неексплодирана субмуниција од ракета на Хезболах, која останала во областа од претходните борби. Израелската војска соопшти дека се испитуваат сите околности на несреќата.

Израелските медиуми објавија дека се истражува можноста еден од учениците да го пронашол експлозивното средство за време на пешачењето и да го зел со себе, по што тоа експлодирало во близина на групата.

На местото биле испратени голем број екипи на итната помош, како и воени хеликоптери за евакуација на повредените. Дел од учениците се хоспитализирани со тешки и полесни повреди.

Полицијата и воените експерти за експлозиви ја пребаруваат областа за евентуални други неексплодирани средства, а властите најавија дека движењето по дел од планинарските патеки во регионот може привремено да биде ограничено.

Share on Facebook

Tweet

Follow us

Save