27-годишник од Македонија убиен во Берлин

Дваесет и седумгодишен македонски државјанин од Радуша е убиен во Берлин, откако врз него било пукано во раните утрински часови во понеделникот. Информацијата дека жртвата е од Радуша ја објавија повеќе регионални медиуми.

Според берлинската полиција, пукањето се случило околу 2.40 часот на крстосницата меѓу Планетенштрасе и Зоненале во населбата Нојкелн. Кон 27-годишникот биле испукани повеќе куршуми, а тој починал на местото и покрај обидите за реанимација.

Германскиот весник „Б.З.“ објави дека двајца мажи го следеле 27-годишникот пред пукањето и дека еден од куршумите го погодил во главата.

Осомничените побегнале, а истрагата ја презеде Петтата комисија за убиства на берлинската криминалистичка полиција во координација со Обвинителството. Мотивот и околностите на убиството се истражуваат.

Share on Facebook

Tweet

Follow us

Save