Основан од АСНОМ: МНТ слави 77 години постоење

Најголемата театарска куќа во Македонија- Македонскиот народен театар денеска одбележува 77 години од основањето. На денешен ден, 1945 година, со решение број 581/45, на Президиумот на АСНОМ, бил основан Македонскиот народен театар. Со тоа започнува со работа оваа нашата национална театарска установа.

Прв директор на МНТ бил Димитар Ќостаров, а Илија Милчин секретар – драматург. Театарската завеса официјално за публиката прв пат била крената на 3 април 1945 година , со премиерата на драмата „Платон Кречет“, од Александар Корнејчук, во режија на Димитар Ќостаров, во превод на Блаже Конески. Актерката Вера Вучкова Жежељ ја изговорила првата реплика на сцената -Сонцето, колку е блиску сонцето !

31. 01. 1945 е денот кога е основан Македонскиот народен театар. Тоа е денот кога желбата на актерите, режисерите, авторите, сценографите, костимографите, сценските работници и публиката, за театар на македонски јазик стана реалност. Тоа е денот кога сонот на група актери и уметници прерасна во јадро на театарска дејност. Денот кога на Президиумот на АСНОМ (со решението бр. 581/45), е основан нашиот дом, домот на сите некогашни и сегашни вработени на Македонскиот народен театар, на сите љубители на театарот. Нека е честит денот, стои во Фб објавата на театарот.

Share on Facebook

Tweet

Follow us

Save