INFOMAX.MK

Украинскиот претседател Володимир Зеленски денес повика на итен пристап на Украина во ЕУ според нова поедноставена процедура, иако не беше јасно како тоа може да функционира во пракса.

„Бараме од Европската унија итно пристапување на Украина преку нова специјална процедура“, рече тој, говорејќи на својот канал Телеграм, додека борбите со руските трупи продолжуваат низ целата земја. „Нашата цел е да бидеме заедно со сите Европејци и што е најважно, да бидеме рамноправни. Сигурен сум дека е фер. Сигурен сум дека тоа е можно.”

Молбата се надоврзува на претходниот повик на Зеленски во саботата да се дозволи пристап на Украина во блокот и доаѓа откако претседателката на Европската комисија Урсула фон дер Лајен во неделата рече дека блокот сака Украина да се приклучи. „Тие се едни од нас и ги сакаме внатре“, рече таа. Украина сè уште не е официјален кандидат за пристапни преговори со ЕУ.

Украинскиот премиер Денис Шмихал во понеделникот додаде дека е време барањето за пристап „да се стави на хартија“ по изјавата на Зеленски: „Одамна докажавме дека сите ние сме интегрален дел од европската заедница“, рече тој.

Сè уште не е јасно како би изгледала ваквата посебна процедура и дали европските лидери би се согласиле на брза опција. Одлуката за додавање нови земји во ЕУ е на веќе воспоставените земји-членки, кои не секогаш се согласуваат со ставовите на Комисијата.

Претседателот на Европскиот совет, Шарл Мишел во понеделникот рече дека има „различни мислења“ меѓу земјите-членки за ова прашање, пренесува АФП.

Од 2017 година, Украина е дел од Договорот за асоцијација со ЕУ, во кој двете се согласија да ги усогласат своите економии во области како што се правата на работниците и да ги продлабочат политичките врски. Украина е исто така дел од Источното партнерство и европската политика за соседство на блокот.

Во меѓувреме во јавноста се појави документ потпишан од Зеленски со кој и официјално Украина бара Украина да биде внесена во ЕУ по брза постапка.

Зеленски го потпиша барањето облечен во воена униформа.