Макрон му вети на Зеленски: Франција ќе ја зајакне воената и хуманитарна помош за Украина

Францускиот претседател Емануел Макрон му вети на својот украински колега Вoлодимир Зеленски дека Франција ќе ја „зајакне“ и воената и хуманитарната помош за Киев.

За време на телефонскиот разговор помалку од една недела по реизборот на Макрон, Зеленски му се заблагодари на францускиот лидер што и дал на Украина воена опрема што „придонела за украинскиот отпор“, се вели во соопштението од Елисејската палата.

Макрон „укажа дека оваа поддршка ќе продолжи да се зајакнува, како и хуманитарната помош обезбедена од Франција“. Претседателскиот кабинет истакна дека Франција веќе и доставила на Украина „повеќе од 615 тони опрема, вклучувајќи медицинска опрема, генератори за болници, храна, потрошен материјал за домаќинството и амбулантни возила“.

Зеленски неодамна изјави дека украинските партнери конечно почнале да му доставуваат на Киев дел од тешкото оружје што тој го барал. Тоа беше откако Франција и Канада ги објавија своите планови да испратат артилериски системи со долг дострел за прв пат.

Во меѓувреме, Русија го предупреди Западот да не ја „пумпа“ Украина со оружје, велејќи дека тоа само ќе го продолжи конфликтот. Москва јасно стави до знаење дека секое странско оружје на украинска територија ќе го смета за легитимна цел.

Макрон, исто така, му ветил на Зеленски дека тим француски експерти ќе продолжи да собира докази во врска со злосторствата наводно извршени „како дел од руската агресија“.

За време на телефонскиот разговор кој траеше околу еден час, францускиот лидер ја потврди својата желба „активно да работи на враќање на суверенитетот и територијалниот интегритет на Украина за време на неговиот втор мандат“ во тесна соработка со европските сојузници.

Макрон, исто така, ја повтори својата „длабока загриженост“ поради „руското бомбардирање на украинските градови“ и „неподносливата ситуација во Мариупол“ и покрај „повторените повици до рускиот претседател да го почитува меѓународното хуманитарно право“. Москва негира дека некогаш целела цивили во Украина и тврди дека фабриката за челик Азовстал сè уште е последното упориште под украинска контрола во Мариупол, со борци од злогласниот неонацистички полк Азов и други единици стационирани таму.
Францускиот претседател изрази надеж за напредок во преговорите меѓу Русија и Украина, велејќи дека преговорите може да донесат „трајно решение на конфликтот и враќање на безбедноста на европскиот континент“.

Во моментов мировните преговори се чини дека се во застој, а рускиот министер за надворешни работи Сергеј Лавров го обвинува Западот дека го принудува Киев да отстапи од претходно договорените услови со Москва.

Макрон беше еден од ретките западни лидери кои од почетокот на руската воена операција во Украина продолжија со директен дијалог со претседателот Владимир Путин. Во исто време, тој инсистираше на зајакнување на санкциите против Москва, вклучително и построги ограничувања за руската енергија.