Џонсон има “генијален” план: Купете нови чајници за да заштедите струја

Британскиот премиер во оставка, Борис Џонсон повторно стана хит на социјалните мрежи, откако на прес-конференцијата им кажа на Британците да ги заменат старите чајници, со нови и на тој начин да заштедат струја.

„Доколку имате стар чајник на кој му треба подолго време за да го свари чајот, тоа може да ве чини 20 фунти за да го замените – но ако земете нов, ќе заштедите 10 фунти годишно на сметката за струја“ изјави Џонсон.

Ваквата изјава доби голем број коментари и реакции на социјалните мрежи и низ британските медиуми, исмејувајќи го британскиот премиер.

Британија, која е погодена од големата инфлација, тешко се справува со големиот скок на цените, пренесува британски Индепендент.

Џонсон додаде дека битката со инфлацијата зависи многу од неговиот наследник. Но, тој рече дека е убеден дека следниот премиер, без разлика дали тоа ќе е Сунак или Трас, ќе понуди поголема „парична“ поддршка.