INFOMAX.MK

По „Никола Вапцаров“ во Благоевград, ќе се отворат уште неколку приватни македонски културни клубови во Бугарија – во Сандански, во Пловдив, најави забранетата партија на Македонците во Бугарија, ОМО Илинден Пирин.

Изминатиов викенд во Штип шест здруженија од Македонија, Бугарија, Грција, Србија, Албанија и од Косово потпишаа декларација „За унапредување на правата и слободите на Македонците во сите делови од Македонија“ на семакедонскиот собир што го организираше штипското здружение „Мирка Гинова“.

Бугарскиот државен врв веќе не се противи што Македонците во Бугарија отвораат клубови, и покрај тоа што не ги признава како малцинство. Потпретседателката Илијана Јотова при посетата на Битола во саботата рече дека темата со бугарските и македонските клубови сака да ја коментира само на ниво на институции на двете држави.

– Што се однесува до клубот во Благоевград, вашите власти кажаа дека тоа е приватна иницијатива и за нас тоа беше доволно. Само да не се подгрева омразата и нова конфронтација меѓу двата народа, и да се почитуваат сите закони и правила. Тоа што некои луѓе се решиле да отворат свој клуб, да си ја развиваат својата дејност и ако овој клуб служи за добрите односи меѓу двете држави, тоа може само да нè радува – вели Јотова.