INFOMAX.MK

Украинскиот претседател Володимир Зеленски пристигна во јужниот град Херсон, кој беше напуштен од руските окупатори на 11 ноември, јави дописникот на веб-страницата Укринформ. Првите зборови на шефот на државата беа дека Херсон се враќа под контрола на Украина. Над 400 воени злосторства извршени од руските сили се документирани во областа и истрагата е во тек.

Зеленски беше пречекан од многу ентузијастички граѓани. „За мене е многу важно да бидам овде денес. Сите ризикуваат – и војската и новинарите. Затоа ми се чини дека е важно да се зборува овде и да се поддржат луѓето од Херсон. За да почувствуваат дека не само што ветуваме , но, исто така, ние всушност ги враќаме нашите територии и нашето знаме“, рече тој. Зеленски награди и војската која учествуваше во ослободувањето на Херсон.

„Одиме напред. Подготвени сме за мир. Мир за целата наша земја“, рече украинскиот претседател. Тој им се заблагодари на НАТО и на другите сојузници за поддршката во војната и повторно ја истакна огромната важност за пресврт на бранот на војната за испорака на американските системи ХИМАРС. На прашањето во која насока ќе се движат понатаму украинските сили, Зеленски рече: „Не кон Москва… Не сме заинтересирани за територијата на друга земја“.

Неколку минути пред пристигнувањето на Зеленски, гранатирањето се слушало недалеку од центарот на Херсон, пренесува Ројтерс. Кога Зеленски почна да зборува, над градот се слушаше артилериски оган.