Арсовска го посети Дневниот центар за престој на деца во ризик во Шуто Оризари: Поддржуваме проекти за подобрување на квалитетот на животот на децата во ризик

Градоначалничката на Град Скопје, Данела Арсовска, денеска го посети Дневниот центар за престој на деца во ризик „Патека на надежта“.

– Денес, заедно со градоначалникот на Шуто Оризари Курто Дудуш, го посетивме Дневниот центар за престој на деца во ризик „Патека на надежта“ и се запознавме со стручниот тим на Здружението на граѓани за иницијатива за развој и инклузија на заедниците, како и со децата корисници на услугите на центарот.

Дневниот центар го користат дечиња на возраст од шест до 10 години, со цел да воспостават здрави хигиенско-диететски навики, да се стекнат со животни вештини преку посебни програми, како и да добијат поддршка за полесен пристап и редовно следење на образовниот процес.

Во дневниот центар стручниот тим кој секојдневно работи со децата е составен од социјален работник, педагог, психолог и помошен персонал. Градот Скопје продолжува континуирано да поддржува значајни проекти за подобрување на квалитетот на животот на децата во ризик и социјално ранливите категории на граѓани. – напиша Арсовска на Фејсбук.