ПОТРЕБНА Е ХЕМИЈА МЕЃУ МАКЕДОНИЈА И БУГАРИЈА: Бугарскиот амбасадор вели дека времето е во наши раце

Времето е во ваши раце. Ние ќе продолжиме да бидеме тука, ќе ги продолжиме програмите и проектите за поддршка на земјата, рече Ангел Ангелов. Според него дипломатијата е во дијалогот и во остварувањето средби, во кои треба да има меѓусебна хемија.

Бугарскиот амбасадор во Македонија, Ангел Ангелов, на вечерашното одбележување на 3 март, Националниот празник на неговата земја, изјави дека во основата на дипломатијата е дијалогот, а улогата да дипломатите е да градат мостови.

– Ова е можно само преку остварување средби и контакти – потребна е хемија, и во оваа смисла нашата улога е да бидеме хемичари. Соочени сме пред нови предизвици – агресијата на Русија врз Украина, ние остро ги осудуваме овие дејствија. Војната покажа дека беше од голема важност членството на Република Македонија во НАТО, нешто што Бугарија безусловно го поддржа – рече Ангелов на настанот во хотелот „Александар Палас“ во Скопје.

– Република Македонија има можност да почне вистински преговори со ЕУ, по исполнувањето на нејзините обврски усвоени од Парламентот и од Советот на ЕУ. Улогата на евроинтеграцискиот процес е важна, се работи за модернизирање на општеството, владеење на правото, екологијата, одбраната, образованието… – вели тој.

Според него, фактот дека билатералната трговија се зголеми на една милијарда евра во 2022, првпат во историјата, покажува дека правецот е добар и дека добрососедските односи немаат алтернатива.

– Времето е во ваши раце. Ние ќе продолжиме да бидеме тука, ќе ги продолжиме програмите и проектите за поддршка на земјата – рече Ангелов.

Share on Facebook

Tweet

Follow us

Save