INFOMAX.MK

Денешната прес-конференција на Борко Ристовски, на која одговори на четиригодишната суспензија од МОК по пријава од претседателот Даниел Димевски, предизвика голем интерес во јавноста и набрзо донесе своевиден одговор од предводникот на македонскиот олимпизам.

Македонските медиуми попладнево беа „бомбардирани“ со мејл испратен од вработена во МОК задолжена за комуникација со „седмата сила“, во кој се содржи „личниот став на Димевски“, кој со во најмала рака детски прашалник се обидува да го врати вниманието кон голманот на Вардар. Петте прашања се во стилот на ученици од основните училишта, кои преку споменари искажуваат мислење за другарчињата.

Така, Димевски прашува дали „знаете човек за кого Борко кажал добар збор“, но и „колку пати треба да му биде дозволено на Борко да навредува, клевети и се заканува на се и секого“, без притоа да наведе конкретни примери. Истовремено, тој се осврнува и кон политичката агенда на Ристовски, но и ги прашува сите минати, сегашни и идни плитичари дали ќе го унапредат спортот со навреди, клевети и закани.

Колку за потсетување, Димевски пред да стане прв човек на МОК беше советник на премиерот Зоран Заев и важи за идеен творец на ваучер-системот, за кој сега жестоко го напаѓа Наумче Мојсовски и АМС како институција.