НИТУ ИМАЛЕ ФИРМИ, НИТУ ПЛАЌАЛЕ ДАНОЦИ ИЛИ АКЦИЗИ! Акција против трговци на црно со режан тутун

На повеќе локации во Скопје екипи на МВР, Царината и на УЈП денеска спроведоа акција против криумчарење на акцизна стока и избегнување на давачки за продажба на режан тутун и производи од тутун без акциза и платени давачки.

За време на контролата е констатирано дека во продажен објект, сопственост на Џ.А., пронајдени се и одземени 90 килограми режан тутун, избегнувајќи плаќање на акциза во износ од 193.500 денари. Покрај ова констатирано е дека објектот нема регистрирано правно лице, за што ќе следи глоба од Државен пазарен инспекторат.

На тезга на влез на пазар, сопственост на У.Х. пронајдени се и одземени 105 кг. тутун, при што е избегната акциза од 225.750 денари, целата стока е одземена од страна на Царинската управа, а против лицето ќе следува и глоба од пазарните инспектори, додека во возило сопственост на О.И. биле пронајдени и одземени 19 килограми режан тутун, со што избегнал плаќање акциза во вкупен износ од 40.850 денари.

Со денешната заедничка акција спречено е криумчарење на акцизна стока со вкупен износ на избегнати давачки кон државата над 460 илјади денари. Против лицата ќе следуваат соодветни поднесоци од надлежните институции.

Во акцијата учествуваа полициски службеници од Одделот за криминалистичка полиција, Сектор за економски криминал и корупција, службеници од Сектор за контрола и истраги при Царинската управа, како и од Управата за јавни приходи и од Државниот пазарен инспекторат.

Share on Facebook

Tweet

Follow us

Save