Ердоган: Засега не можеме позитивно да гледаме на членството на Шведска во НАТО

Засега не можеме позитивно да гледаме на членството на Шведска во НАТО, изјави турскиот претседател Реџеп Таип Ердоган во интервју за Си-Ен-Ен.

Турција, која ја има втората по големина армија во НАТО, го блокираше членството на Стокхолм во Алијансата, обвинувајќи го дека дава засолниште на борци од забранетата Курдиска работничка партија (ПКК).

– Сè додека шведските власти продолжуваат да дозволуваат поединци поврзани со терористички групи слободно да шетаат во Шведска, не можеме да гледаме позитивно на членството на оваа земја во НАТО, рече Ердоган. – Во моментов не сме подготвени за Шведска, бидејќи земја-членка на НАТО мора да има цврст став кога станува збор за борбата против тероризмот, потенцира турскиот претседател.

Шведска ги одби повторените барања на Турција за екстрадиција на луѓе кои ги смета за терористи, тврдејќи дека за ова прашање може да решаваат само шведските судови.

По ратификацијата во турскиот парламент, Финска официјално се приклучи на Алијансата на 4 април, но Турција се уште не дава „зелено светло“ за членството на Шведска. Според Анкара, Стокхолм мора да преземе поконкретни чекори во борбата против тероризмот за да биде примен во НАТО.

Share on Facebook

Tweet

Follow us

Save